LDB Bank ປະກາດຜົນກຳໄລສຸດທິ ປະຈຳໄຕມາດ I ປີ 2024, ເພີ່ມຂຶ້ນ 196% ທຽບໃສ່ໄລຍະດຽວກັນ ຂອງປີທີ່ຜ່ານມາ

ໃນວັນທີ 25-27 ເມສາ 2024 ທີ່ຜ່ານມາ, ທະນາຄານ ພັດທະນາລາວ ຈໍາກັດ (ທພລ) ໄດ້ດໍາເນີນກອງປະຊຸມ ສະຫຼຸບຜົນການດໍາເນີນທຸລະກິດ ປະຈຳໄຕມາດ I ປີ 2024 ແລະ ວາງທິດທາງແຜນການດໍາເນີນທຸລະກິດ ປະຈໍາໄຕມາດ II ປີ 2024 ທີ່ໂຮງແຮມ ພູແມນ ນະຄອນຫຼວງພະບາງ ພາຍໃຕ້ການເປັນປະທານຮ່ວມ ຂອງທ່ານ ສິດທິສອນ ເທບພາສີ ປະທານສະພາບໍລິຫານ ທພລ, ທ່ານ ຈັນທະໜອມ ພົມມະນີ ປະທານຄະນະກໍາມະການບໍລິຫານງານ ທພລ ໂດຍມີ ຄະນະທີ່ປຶກສາ, ຄະນະຜູ້ອໍານວຍການ, ຄະນະຝ່າຍ, ຄະນະສາຂາພາກ, ສາຂານ້ອຍ, ຄະນະຂະແໜງ, ໜ່ວຍບໍລິການ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.

ກອງປະຊຸມໄດ້ລາຍງານໃຫ້ຮູ້ວ່າ: ຜົນການດໍາເນີນທຸລະກິດ ປະຈຳໄຕມາດ I ປີ 2024 ຂອງ ທະນາຄານ ພັດທະນາລາວ ມີຜົນກໍາໄລສຸດທິ ເພີ່ມຂຶ້ນ 196% ທຽບໃສ່ໄຕມາດ I ປີ 2023. ສຳລັບໄຕມາດທີ I ປີ 2024 ທພລ ໄດ້ຂຶ້ນແຜນຍອດສິນເຊື່ອໃຫ້ເພີ່ມຂຶ້ນ 5%, ແຕ່ປະຕິບັດໄດ້ຕົວຈິງ ເກີນແຜນທີ່ວາງໄວ້ 11%; ໃນນີ້ມີ: 1.) ເງິນກູ້ປົກກະຕິ (A) ກວມເອົາ 99.70% ຂອງຍອດສິນເຊື່ອທັງໝົດ, 2.) ເງິນກູ້ປົກກະຕິ (B) ກວມເອົາ 0.25% ຂອງຍອດສິນເຊື່ອທັງໝົດ, 3.) ເງິນກູ້ທີ່ເປັນ NPLs ກວມເອົາ 0.05% ຂອງຍອດສິນເຊື່ອທັງໝົດ; ສ່ວນທຶນທັງໝົດຂອງທະນາຄານ ມີຈໍານວນ 2,486 ຕື້ກີບ ເພີ່ມຂຶ້ນ 19% ທຽບໃສ່ ທ້າຍປີ 2023.

ຜ່ານການຈັດຕັ້ງປະຕິບັດວຽກງານ ໃນໄຕມາດທີ່ຜ່ານມາ, ທພລ ໄດ້ສືບຕໍ່ເລັ່ງສຸມໃສ່ຫຼາຍວຽກງານ ເປັນຕົ້ນແມ່ນ • ການຂະຫຍາຍ-ປັບປຸງ ແລະ ເປີດໃຫ້ບໍລິການ ອາຄານ ສາຂາ ແລະ ໜ່ວຍບໍລິການຂອງ ທພລ ໃນຂອບເຂດທົ່ວປະເທດ ເພື່ອອໍານວຍຄວາມສະດວກ ແກ່ການຮັບໃຊ້ໃຫ້ບໍລິການແກ່ສັງຄົມ ໄດ້ເຂົ້າເຖິງການບໍລິການທາງດ້ານການເງິນ ທີ່ມີຄຸນນະພາບ ແລະ ເປັນມາດຕະຖານ. • ດ້ານວຽກງານສິນເຊື່ອ ທພລ ກໍ່ໄດ້ເອົາໃຈໃສ່ໃນການຕິດຕາມ, ຄຸ້ມຄອງ, ຮັກສາຄຸນນະພາບສິນເຊື່ອ ໃຫ້ຢູ່ໃນເກນທີ່ກໍານົດໄວ້, ໂດຍໄດ້ເອົາໃຈໃສ່ ໃນການເຮັດວຽກ ໃຫ້ຄຳແນະນຳ ແລະ ສະໜັບສະໜູນເປັນທີ່ປຶກສາ ແກ່ລູກຄ້າທີ່ໄດ້ຮັບສິນເຊື່ອ ຢ່າງໃກ້ຊິດ ເພື່ອໃຫ້ແຜນທຸລະກິດຂອງລູກຄ້າ ສາມາດຈັດຕັ້ງປະຕິບັດໄດ້ ບົນພື້ນຖານການສ້າງຜົນກຳໄລ ແລະ ປະສົບຜົນສຳເລັດຮ່ວມກັນ. ສຳລັບການຂະຫຍາຍສິນເຊື່ອໃນຕໍ່ໜ້າ ທພລ ແມ່ນເນັ້ນໜັກ ແລະ ໃຫ້ບູລິມະສິດ ໃນການສະໜອງທຶນແກ່ ທຸລະກິດກະສິກຳ ລວມເຖິງທຸລະກິດດ້ານອື່ນໆ ທີ່ມີຕະຫຼາດຮອງຮັບ ໃນການສົ່ງອອກຕ່າງປະເທດ ແລະ ມີລາຍຮັບເປັນເງິນຕາຕ່າງປະເທດ ເພື່ອໃຫ້ສອດຄ່ອງຕາມແນວທາງນະໂຍບາຍຂອງລັດຖະບານ ໃນການພັດທະນາ ເສດຖະກິດ-ສັງຄົມ ຂອງປະເທດ. • ດ້ານວຽກງານໄອທີ ພວກເຮົາກໍໄດ້ຍົກສູງ ເປັນອີກວຽກງານໜຶ່ງບູລິມະສິດ, ໂດຍໄດ້ມີການພັດທະນາຜະລິດຕະພັນ ເພື່ອຮອງຮັບໃຫ້ບໍລິການແກ່ລູກຄ້າ ໂດຍສະເພາະແມ່ນແອັບ LDB TRUST ຍອດເຕີບໂຕຂອງຜູ້ຊົມໃຊ້ ເພີ່ມຂຶ້ນສູງເຖິງ 98% ທຽບກັບໄຕມາດ I ປີ 2023, ເຊິ່ງ ທພລ ໄດ້ເນັ້ນພັດທະນາໃຫ້ແອັບດັ່ງກ່າວ ມີຄວາມທັນສະໄໝ, ສະດວກ, ໃຊ້ງານງ່າຍ ແລະ ເຂົ້າກັບວິຖີຊີວິດຂອງສັງຄົມລາວ ພ້ອມທັງຟຣີຄ່າທໍານຽມການໂອນພາຍໃນ ເພື່ອອໍານວຍຄວາມສະດວກສະບາຍ ໃນການໃຫ້ບໍລິການແກ່ລູກຄ້າ ທີ່ຕອບໂຈດ ແລະ ປະທັບໃຈ ເພື່ອໃຫ້ເປັນໜຶ່ງໃນທາງເລືອກຂອງສັງຄົມ. • ສ່ວນວຽກງານການສ້າງຄວາມເຂັ້ມແຂງ ແລະ ເຊື່ອມໂຍງ ແບບແຜນ ແລະ ມາດຕະຖານການເຮັດວຽກຂອງບຸກຄະລາກອນ ພາຍໃນອົງກອນ ທພລ ແມ່ນໄດ້ສືບຕໍ່ຈັດຕັ້ງປະຕິບັດ ຢູ່ບັນດາສາຂາພາກທີ່ເປັນບູລິມະສິດ ເປັນຕົ້ນແມ່ນ: ສາຂາພາກ ນະຄອນຫຼວງ, ສາຂາພາກຫຼວງພະບາງ, ສາຂາພາກ ສະຫວັນນະເຂດ ແລະ ສາຂາພາກ ຈຳປາສັກ ໂດຍໄດ້ມີການຈັດຝຶກອົບຮົມວຽກງານແຕ່ລະດ້ານ ຢ່າງເປັນປະຈຳ. ພ້ອມດຽວກັນນັ້ນ, ກໍ່ໄດ້ສົ່ງພະນັກງານທີ່ມີຄວາມຮູ້-ຄວາມສາມາດ ຈາກ ທພລ ສຳນັກງານໃຫຍ່ ໄປປະຈຳການ ແລະ ນຳພາປະຕິບັດວຽກງານຮ່ວມກັບ ພະນັກງານຂອງສາຂາຢ່າງໃກ້ຊິດ ເພື່ອໃຫ້ບັນລຸຕາມຈຸດປະສົງໃນການສ້າງ ແລະ ເຊື່ອມໂຍງ ລະຫວ່າງ ສຳນັກງານໃຫຍ່ ແລະ ສາຂາທົ່ວລະບົບ ໃຫ້ມີມາດຕະຖານທີ່ໃກ້ຄຽງກັນ; ສ່ວນແຜນໃນຕໍ່ໜ້າ ແມ່ນຈະໄດ້ສືບຕໍ່ ຢູ່ບັນດາສາຂາພາກ ທີ່ເປັນບູລິມະສິດຖັດໄປ ເຊັ່ນ: ສາຂາພາກ ບໍ່ແກ້ວ, ສາຂາພາກ ຊຽງຂວາງ ແລະ ສາຂາພາກ ບໍລິຄຳໄຊ.

ສຳລັບໄຕມາດ II ປີ 2024 ນີ້, ທພລ ຈະສືບຕໍ່ດໍາເນີນທຸລະກິດ ຕາມແຜນຍຸດທະສາດທີ່ວາງໄວ້ ໃຫ້ໜັກແໜ້ນ, ສືບຕໍ່ປະຕິບັດພາລະບົດບາດ ໃນການໃຫ້ບໍລິການທາງດ້ານການເງິນທີ່ເປັນມາດຕະຖານ ແລະ ມີຄຸນນະພາບ ແກ່ສັງຄົມ ດ້ວຍການໃຫ້ບໍລິການທີ່ຫນ້າປະທັບໃຈ ແລະ ເປັນມາດຕະຖານດຽວກັນ ໃນຂອບເຂດທົ່ວປະເທດ ເພື່ອຮັບໃຊ້ສັງຄົມ ກໍ່ຄື ບັນດາລູກຄ້າ ຂອງ ທພລ ຕາມຄໍາຂວັນທີ່ວ່າ “ມິດທີ່ດີ ຢູ່ຄຽງຂ້າງທ່ານ ການຮ່ວມທຶນແບບຍືນຍົງ”.

ໃນໂອກາດດຽວກັນ, ທະນາຄານ ພັດທະນາລາວ ຍັງໄດ້ຮ່ວມສະເຫຼີມສະຫຼອງ ວັນສ້າງຕັ້ງ ທະນາຄານ ພັດທະນາລາວ ຄົບຮອບ 21 ປີ (09/04/2003 – 09/04/2024) ເຊິ່ງການຈັດພິທີໃນຄັ້ງນີ້ ແມ່ນເພື່ອຮ່ວມສະຫຼອງວັນສຳຄັນ ຂອງ ທພລ ແລະ ສະແດງໃຫ້ເຫັນເຖິງການປະຕິບັດພາລະກິດຮ່ວມກັນ ຂອງພະນັກງານ LDB TEAM ຢ່າງພາກພູມໃຈ ຕາມວິໄສທັດ ແລະ ກົນໄກການບໍລິຫານໃນຍຸກໃໝ່ ເພື່ອພ້ອມກັນກ້າວສູ່ເປົ້າໝາຍ ແລະ ຄວາມສໍາເລັດແບບຍືນຍົງ.

ldb